အားလပ်ရက်မှာ လုပ်ပေးသင့်တဲ့ လေ့ကျင့်ခန်းအမျိုးအစားတွေ
Gym မှာ ကျန်းမာရေးနဲ့ အလှအပကြောင့် လေ့ကျင့်ခန်းသွားလုပ်ကြတယ်ဆိုပေမယ့် အများစုက အားလပ်ရက်၊ ရုံးပိတ်ရက်တွေဆိုရင် လည်ပတ်ဖို့ကိုပဲ စိတ်အားထက်သန်ပြီး Gym မသွားဖြစ်ကြပါဘူး။ ပိတ်ရက်ဆိုပေမယ့်လည်း ကိုယ်လက်လှုပ်ရှားမှုရှိခြင်းက ကိုယ့်ရဲ့တစ်နေ့တာကို ကျန်းမာစေပြီး လန်းဆန်းတက်ကြွစေလို့ အားလပ်ရက်တွေမှာ Gym မသွားဘူးဆိုရင်တောင် အိမ်၊ အနီးပတ်ဝန်းကျင်မှာ လွယ်ကူတဲ့ လေ့ကျင့်ခန်းတွေကို လုပ်ပေးသင့်ပါတယ်။
၁။ ရေကူးလေ့ကျင့်ခန်း
ရေကူးတယ်ဆိုတာ လေ့ကျင့်ခန်းအနေနဲ့ရော ကိုယ်ဝါသနာပါတဲ့ အားကစားအနေနဲ့ပါ လိုက်စားလို့ရပါတယ်။ ရေကူးခြင်းဖြင့် ခန္ဓာကိုယ်တစ်ခုလုံးက ကြွက်သားတွေကို လေ့ကျင့်ပေးရာရောက်သလို အရပ်ရှည်စေဖို့ကိုလည်း ကူညီပေးနိုင်ပါတယ်။ ကိုယ့်အိမ်မှာ ရေကူးကန်ရှိရင်တော့ အဆင်ပြေပေမယ့် အနီးပတ်ဝန်းကျင်က ပုဂ္ဂလိကရေကူးကန်တွေမှာလည်း ရေကူးပေးလို့ရပါတယ်။ တစ်ရက်ကို နာရီဝက်ကနေ တစ်နာရီဝန်းကျင်လောက် ရေကူးလိုက်ရုံနဲ့ ထိရောက်တဲ့ အာနိသင်ကို ရစေနိုင်ပါတယ်။
၂။ လမ်းလျှောက်လေ့ကျင့်ခန်း
လမ်းလျှောက်တယ်ဆိုတာ Gym သွားစရာမလိုသလို အလေးတုံးလည်းမလိုဘဲ ကိုယ့်အိမ်မှာ အလွယ်တကူလုပ်လို့ရတဲ့ လေ့ကျင့်ခန်းတစ်မျိုးပါပဲ။ လမ်းလျှောက်ပေးခြင်းဖြင့် ကယ်လိုရီတွေကို လောင်ကျွမ်းစေပြီး သွေးလည်ပတ်စနစ်ကို အားကောင်းစေတယ်။ ကိုယ်နေဟန်ထားကောင်းစေပြီး အရိုးအဆစ်တွေကိုလည်း ကျန်းမာစေပါတယ်။ လမ်းလျှောက်ဖို့အတွက် အိမ်ခန်းအတွင်း ဒါမှမဟုတ် အနီးပတ်ဝန်းကျင်မှာ လမ်းလျှောက်ပေးနိုင်ပါတယ်။ အကယ်လို့ လမ်းလျှောက်တာကို မကြိုက်ဘူးဆိုရင် အစားထိုးအနေနဲ့ အပြေးလေ့ကျင့်ခန်းကိုလည်း လုပ်ပေးနိုင်ပါတယ်။
၃။ Plank ထောက် လေ့ကျင့်ခန်း
ကယ်လိုရီတွေ လောင်ကျွမ်းစေပြီး ခန္ဓာကိုယ်အပေါ်ပိုင်း (ရင်အုပ်၊ ပုခုံး၊ ကျောပြင်၊ လက်မောင်း) ရဲ့ ကြွက်သားတွေကို ကောင်းကောင်းလေ့ကျင့်ပေးနိုင်တယ်။ ဝမ်းဗိုက်အဆီကျစေပြီး ကြွက်သားရဲ့ ကျုံ့ဆန့်နိုင်စွမ်းကိုလည်း အားကောင်းစေပါတယ်။ ကိုယ်ခံနိုင်ရည်ရှိသလောက် အနည်းဆုံးတစ်မိနစ်ကနေ (၃) ကြိမ်အထိ Plank ထောက်ပေးနိုင်ပါတယ်။
၄။ ဒိုက်ထိုးလေ့ကျင့်ခန်း
ဒိုက်ထိုးခြင်းဟာ ကျား၊ မ မရွေး လုပ်ပေးလို့ရတဲ့ လေ့ကျင့်ခန်းဖြစ်ပေမယ့် ရင်အုပ်ကြွက်သားကို တောင့်တင်းသန်မာစေလို့ ယောက်ျားလေးတွေ ပိုအလုပ်များတဲ့ လေ့ကျင့်ခန်းဆိုလည်း မမှားပါဘူး။ ဒိုက်ထိုးခြင်းဟာ အသက်ရှူစနစ်နဲ့ ခန္ဓာကိုယ်ရဲ့ သွေးလည်ပတ်စနစ်ကို အားကောင်းစေတယ်။ ချွေးပိုထွက်စေလို့ ကယ်လိုရီလောင်ကျွမ်းစေပြီး နှလုံးကိုလည်း အားကောင်းစေတယ်။ ဒါ့အပြင် လိင်ပိုင်းဆိုင်ရာ စွမ်းဆောင်ရည်ကိုလည်း ပိုကောင်းစေတာကြောင့် နေ့၊ ည မရွေး ဒိုက်ထိုးပေးလို့ ရပါတယ်။
၅။ ထိုင်ထ လေ့ကျင့်ခန်း
ထိုင်ထလုပ်တယ်ဆိုတာ ကျွန်တော်တို့ငယ်ငယ်တုန်းက ကျောင်းမှာအပြစ်ပေးတဲ့အနေနဲ့ လုပ်ခဲ့ရတာဆိုပေမယ့် တကယ်တမ်းမှာ ခန္ဓာကိုယ်အောက်ပိုင်းအတွက် တော်တော်လေး အကျိုးသက်ရောက်မှုရှိတဲ့ လေ့ကျင့်ခန်းတစ်ခုပါပဲ။ အလေးတုံးနဲ့ ထိုင်ထလုပ်လို့ရသလို၊ အလေးတုံးမပါဘဲ တင်ပဆုံကြွက်သားကို အားပြုလို့ အကြိမ်ရေများများ ထိုင်ထလုပ်ပေးခြင်းဖြင့် ခြေသလုံး၊ ပေါင်တံ၊ တင်ပါးကြွက်သားတွေကို ကြီးထွားစေရုံသာမက ခန္ဓာကိုယ်ကို ဟန်ချက်ညီစေဖို့လည်း ကူညီပေးနိုင်ပါတယ်။
အားလပ်ရက်မှာ လေ့ကျင့်ခန်းလုပ်မယ့်သူတွေအနေနဲ့
၁။ မနက်အိပ်ရာနိုးနိုးချင်းမှာ လေ့ကျင့်ခန်းကို လုပ်ပေးပါ။
၂။ ရေကို များများသောက်ပေးဖို့ မမေ့ပါနဲ့။
၃။ လေ့ကျင့်ခန်းလုပ်ပြီး ချွေးခြောက်တာနဲ့ ရေချိုးသန့်စင်ပေးပါ။
၄။ ဘယ်နေရာရောက်ရောက် လေ့ကျင့်ခန်းလုပ်လို့ရတယ်ဆိုတာကို မမေ့ပါနဲ့။
လေ့ကျင့်ခန်းနဲ့ အစာအာဟာရကို နေ့စဉ်ဂရုစိုက်ပေးမယ်ဆိုရင် ကျန်းမာပျော်ရွှင်တဲ့ နေ့ရက်တွေကို ပိုင်ဆိုင်ရမှာ အသေအချာပါပဲ။
ရဲမျိုးမြတ်